رواية ولد العم

يسعد لي صباحكم ومساؤكم وكل اوقاتكم يارب

بصراحة شفت هالقسم بالذات وهو قسم الروايات فاضي حبيت اجيب
لكم رواية حلوة وقريبة من مجتمعنا اللي عايشينه كبداية لهذا القسم

وان شاء الله يكون القادم احلى ...

اولا راح ابدآ بعرض ابطال الرواية وشرح مبسط لدور كل شخص
فيهم

ابطال القصه

سمر : بنت حلوة وعليها حركات صبيان لانها البنت الوحيده من
بين 3 صبيان
يعقوب: ولد عم سمر , حلو ومغرور وميت على سمر
سارة: اخت يعقوب الحلوة وصديقه سمر
حمد : ولد عم سمر وسارة .. اللي راد من السفر
حمدان : اخو سمر الكبير عاشق سارة

موضوع: الجزء الاول الأربعاء فبراير 23, 2011 4:33 am

الجزء الأول:
==========
صبحيه يوم اليمة ..
الكل كان نايم في بيت بو حمدان .. ما-عدا سمر اللي تاخذ راحتها بعيد عن اخوانها
عشان تمارس رياضتها اليومية .. كرة السلة .. سمر البنت الأولى بعايلة بوحمدان اللي معروف عنه بأبو
الشباب من كثر الصبيان اللي عنده .." لا اله الا الله " أمها نجاة
البحرينية الأصل تزوجت من أبو حمدان قبل 25 سنه يوم كانوا يدرسون مع بعض في مصر..
حبوا بعض من أول نظرة وما قدروا انهم الا يتزوجوا وانتقلت نجاة مع زوجها للكويت
بعيد عن أهلها.

الشمس للحين ما جاست
حرارتها الأرض وسمر فرحانة حيل بالجو ويالسة تتنقز وتنقز الكورة وياها واهي تقول
في خاطرها .. لا يوبا اليوم لازم لازم العب وياهم مو على كيفهم لمتى لازم اتحمل
ثقل دم حمدانو ومشعلو واخليهم دايم ينفذون فيا مقالبهم

وظلت تتدرب ليما دقت
ساعتها الالكترونيه بموعد قعده امها ولقفت الكورة وقامت تراكض بعمرها عشان تلحق
على غرفتها قبل لا يشوفها احد
للاسف الشديد الوالده
كانت صاحيه وقاعده بالصاله تشرب شاي الصبح وتهز ريلها لانها تدري ان بنتها للحين
على حركاتها " الصبيانيه" على حد تعبيرها بس سمر اللي ماعطه امها اقنور
... على فكرة سمر ما تتكلم عربي عشان تقهر امها.
" انتي
ما تيوزين " اوووووووووووف قالت سمور في خاطرها بدت محاظرة يوم اليمعه ..
المشكله ان سمر حافظه هالمحاظرة بالتفصيل الممل .. وحافظة المقطع اللي ينزل فيه
اخوها ناصر اللي اهو توأم سمور بس ما يتشابهون على الرغم من علاقتهم القوية مع
بعضهم البعض .. يوم نزل نصور ظل مكانه واقف عند الدري واهو يضحك على اخته وشكلها
الملان من كلام امها وما تدري شنو تسوي والتفتت حق نصور اللي مو شايل روحه من
الضحك والكركرة على سمور المسيجينه واهي يالسه تتوعد فيه وتقول له بصوت واطي ما
ينسمع .. بوريك يالدب بوريك واهو راح فوق عشان ينادي اخوانه عشان تكمل التطميشه
عليها. ويوم انزلو الشباب انصدموا بابوهم اللي كان قاعد بالصاله وسمور الدبه تتدلع
عليه

حمدان . اكبر الاخوان .
اول من سلم على ابوه وحب راسه وايده ويلس حذال ابوه بعد ما شبع من مرافس سمور
المسيجينه عشان تتباعد شوي واهو يقول لها : خفي دلع يالدبه
سمور : انت مو شغلك يا
ويه البطه لا تتدخل. يا ملغك
قامت سمور واهي تتحدى
اخوانها كلهم
سمر: اليوم انتو زهبو
حالكم حق اكبر فوز يا اخواني الاعزاء لاني راح اشارككم في اللعب مع عيال عمي يوسف
وعمي سليمان.
الكل سكت ومرة وحده
انفجروا كلهم الشباب بالضحك . ووقف مشعلو .. اكبر مليغ بالعايله واهو يحاربها
مشعل: انتي شفيج جذي
وايد تتلزقيين بالرياييل لايكون ريال واحنه ماندري .. لاتحلمين يا بعد قلبي لان ماكو لعب وكافي عااااااااد
صار لج دهر وانتي دوم تهددينا بهالموضوع وماردج تنثبرين مكانج يم راما الخدامه
سمر: انت ماتقول من وين
لك هالملغ .. والتفتت صوب ابوها اللي يالس يضحك من قلب عليها
سمر: يوبا شوف ولدك
هاذا الجيكر ما يخليني العب وياكم
الاب : يوبا ما يصير
تلعبين ويا الشباب انتي بنت حلاتج مثل بنت عمج سويرة يحليلها كل الانوثه فيها
سمر : اووووووووووووف
انه هاذي سارو ما ادانيها .. ولا تقعد تقولي تشبهي فيها يوبا متى راح تفهم اني
يونيك
حمدانو: قلبي ويهج زين
قال شنو قال يونيك .. انتي فهمي معناته يوبا بعدين تحجي
سمر : انه اعرف معناته
مو مثلك ياللوووح ما تعرف الyes من
الno
نصور يلس حذال حمدان
واهو ناوي نويه على اخته : انه اقوللج الyes والno حقت اخوي noلعب و yes حقران لج هههههههههههههههههههههههههه
يلس الكل يضحك عليها
واهي منقهرة حييييييييييل منهم ويلست تكمل دلع علىابوها.
سمر : يوبا شوف هالبط
هاذولي .. ولا واحد فيه خير يالسين يتعافرون وياي مو من شي من الخوف انهم يغلبون
كبديل عن كل يمعه جدام يعقوب ورشود
واهي تتدلع اكثر : يوبا
حبيبي تكفى عاد عاد احبك انه.. محد يحبك كثر ما انه احبك تكفى يوبا طلبتك
الاب: انزين يالله عاد
ساح نصج وانتي تتدلعين .. كمل كلامه واهو يحاجي الشباب .. يالله يا عيال خلوها
تلعب
الشباب كلهم بصوت واحد
: تكفى تكفى يوبا شنو نلعبها
حمدان : هاذي اصلا
تفشلنا جدام عيال خالي وعمي شنو بنت تراكض ويانا
مشعل: أي يوبا شنو خبله
هاذي بتمشي خبالها عليك لا يوبا انت اكبر من جذي
نصور : أي نعم هاذي
اكبر خبله يوبا لا تمشي كلامها عليك
سمر: نصور اوريك
يالخاين ان كلمت النسرة زينو عنك هاذا ويهي
مشعل : تكفين عاد ويا
ويهج
نصور : اصلا انه مو
محتاجج يالخبله كفايه اني اتكشخ واركب سيارتي وايي صوب مدرستكم واخبل رفيجتج هاذي
واخليها تستخف بالهده لذا لا تقعدين تهددين
الاب: يالله عاد كافي
يا عيال وانتي يا سماري .. حبيبتي فظيها سيرة يعني كل مرة لازم تعلينا بهالساالفه
سمر عاد بوزت ونزلت
البراطم من القهر واهي تقول لابوها
سمر/: يا ريتني ولد
جليله حظ انه والله لكن انتو يا قوم البط بيي اليوم اللي بتتوسلوني العب وياكم لكن
اللي يوافق
كملت كلامها واهي تركض
على الدري وحابسها دموعها من القهر لان ماعندها اصدقاء ولا رفيجه تشكي لها همها
ومشاكلها.

الجزءالثاني

============================

وصلت العوايل كلها .. يوسف ابو يعقوب اول من وصل ويا عياله سارة يعقوب
وراشد اللي ما يفصل بينهم بالعمر الا سنه ونص بس تحس يعقوب اكبر من راشد
بوايد لان يعقوب اضخم وايد من راشد الضعيف ووايد اوسم منه من جذي شايف حاله
على قوله سمر .. وعمها سليمان وصل معاه ولده وليد وبنته الصغيرة رغد اللي
لازم تتهاوش على الغذا مع سمور على طريقه لبسها .. واخيرا عمتها زاهيه وصلت
مع زوجها مبارك اللي للحين الله ما عطاهم الذريه مع ذلك عايشين احلى عيشه
مع بعضهم مو هامهم شي

يلسن الحريم مع بعض بالصاله الجبيرة والرياييل بالصاله الثانيه وطبعا سمر
معاهم .. حتى ان سارة بنت عمها المسيجينه اللي بتموت وتكون علاقه وياها
قعدت وياهم مع انها تستحي من عيال عمها اللي ماكلينها اكال بعيونهم وكلامهم
الحلو عنها واهي ما تقدر ترد عليهم بس اهي وايد تحب سمر ووايد تحلم انه
تكون ارفيجتها مع ان فارق السن بيناتهن ماهو بجبير بس سمر تعتبر سارة وايد
دليعه وبطه.

الحوار بين الاب والعمين والنسيب هاذا اهو ما يتغير السياسه وفكرة بو حمدان
انه يرشح حاله لمجلس الامه واخوه يوسف اللي يوافقه ويشجعه انه يشارك
وسليمان ومبارك معارضين حق الفكرة.

والشباب هاذي هي سوالفهم.. والتخطيطات حق السفر بالعطله الجريبه

ابو حمدان قطع الفوضى اللي صايرة بسؤاله حق سليمان : بو حمد الا ما قلت لي
شخبار حمد ولدك والله له وحشه من زمان ما سمعنا عنه شي شخباره شعلومه.

اهني سمور ارتجفت وخلت الاكل من يدها وعينها بدت تلمع .. حمد ولد عمها ..
الله صار لها فترة ما شافته من يوم ما راح اميركا حق الدراسه قبل 3 سنوات
للحين ما شافته .. اهو اكبر منها ب3 سنوات بس اهي دايم حست بمشاعر غريبه
تجاهه وحست انها وايد تعزه غير عن خوانه لانه كان طيب حيييييييييييل ووسيم
بشكل كبير

حتى ان حمدان ويعقوب يغيرون منه مووووووووووت وما يدانونه ..

طلعت سمور حالها من حاله الغيبوبه واهي تتذكر ويلست تسمع اخر اخبار حمد

بو حمد: والله شاقول لك يا بو حمدان.. الولد متوله يبي يرد الكويت ودايم
يسلم عليكم وولهان حيل لامه بس شنسوي .. المدرسه والدراسه ماخذه وقته كله
واهو بعد يدرس بالصيف عشان ما يقزرها سبع سنين هناك وان شالله بيرد بعد 6
شهور

سمور ما صدقت عمرها ووقف من الفرحه واهي تعيد كلام عمها : 6 شهور.. حمد
بيرد بعد 6 شهور كلولولولولش

ويلست تيبب واخوانها ماتو من الضحك عليها ومو قادرين يشدون حالهم ويعقوب
اول من استلمها

يعقوب: انتي يا الرقله اشفيج نقزتي جذي الا يشوفج يقول عاضتج جراده ولا
نحله .. خرعتينا ما تيوزين انتي عن هالحركات

سمر: طالع هاذا .. انت يا ملك البط .. وييعقوب انصدم من اللقب .. ما تسكت
زين .. انه ادري فيك انت وحمدانو اخوي ما تدانون حمد ليش انه وااااايد احسن
منكم .. ولا تقعد تتغشمر علي ويا خشتك تراني للحين ما قلت حق خالتي عن
سواياك بالشارع ذيج الليله ..

سارة ضحكت هالمرة من شكل يعقوب اللي انقلب من الضحك الى البرود والغباء
لانه يدري عن شنو تتكلم هالسوسه سمور وسكت عنها وقال لها بصوت واطي ..
اوريج يا سحليه البيت اوريج

سمور ما عطته ويه خير شر واهي تسكت فيه : يالله يالله لا اللحين اقلبها
هوشه هني ... ها عمي شرايك

بو يعقوب : يا بعد قلبي خلج من هالشباب والله راح تدوخين وياهم كافي بالبيت
ويا سارو هم انتي هني تكفين يا حبيبه قلب عمج خليهم عنج احسلج

سمر ما قعدت وكملت دربها ووراها بنت عمها سارة والشباب يزقرونها : وين
رايحه يا بنت العم خلج ويانا عن هالسحليه

هني سارو افتشلت وقالت :: ماكو بنات مالي قعده وياكم

وراحت بسرعه عن لاتسمع اكثر وتموت من الفشيله بعدين واهي تقول في بالها ..
الله ياخذ بليسج يا سمور والله فشلتيني

بين حمدان ونصور سارة كانت محور كلامهم ..

حمدان : فديتها بنت عمي شنو حلوة

نصور: هاا يالسيمباتيك اشوفك تقردنت

حمدان: اووووووف يا اخوي اني صج صج تقردنت بس مادري اخاف ابوي ما يرضى

نصور : صل على النبي وين تحصل لها على سيمباتيك مثلك .. شكل وكشخه ورزة ولا
سياارة

حمدان : تتمصخر ويا ويهك انت يالهيلق

نصور : هههههههههههه لا يااخوي بس انه مااقول الا الحق

حمدان : شرايك ؟ اقط القنبله على ابوي بعد الغدا

نصور : قطها شعلينا احنه هاذا نص دينك يا ريال

حمدان: وانت الصاج يا السحليه

نصور: بالتوفيق

حمدان: الله المستعان

الكل تغدى احلى غدى والكل مدح طباخ ام حمدان وسمور اللي من يوم ما سمعت خبر
ولد عمها مادانت الغدى وبغتها من الله عشان يخلص الغدى وتروح دارها عشان
تفكر فيه هناك على راحتها .. لكن اللزقه سارو مو راضيه تفج عنها واليوم
سمور كلش مالها بارظ حق سوالفها وقالت بينها وبين نفسها اليوم ان اصرت علي
اروح وياها المجمع بشق حلجها

لكن سارة فطينه فهمت ان بنت عمها تبي تيلس لحالها شوي وخلتها وقعدت مع
خالاتها وتشاركهن السوالف عن الاستعدادات حق زواج اخت زوج زاهيه وسمور راحت
غرفتها اول ما ركبت سمور لدارها قفلت الباب عليها وقامت ترقص واهي تغني
"ياحلوكم يا حلوكم شوفو شوفو ياحلوكم مافي مثلكم يا هلي الله يحفظكم" واهي
ترفع برواز من فوق المكتب فيه صورة عائليه حق العايله كلها يوم كانو
مسافرين الاردن قبل 3 سنين وكانت سمور صغيرة بذيج الرحله عمرها كان 13سنه
وبالصورة كانت واقفه حذال حمد اللي كان لامها حييييييل عشان تطلع بالصورة
واهي كانت تضحك من قلب لانها من ذاك الموقف وقلبها يدق لحمد .

. بعد دقايق واهي ترجع بذكرياتها تذكرت .. حمد عايش باميركا .. معناته اهو
تفكيره راح يكون غير وتصوراته عن بنت احلامه راح تكون غير ويمكن .. ويمكن
.. لكن لالالا ماكو مثل حمد .. حمد اصيل ويحب الاصالة ويموت على الرقله
والرباشة الزايدة وكان دوم يقول لها قبل لا يسافر .. خلج مثل ما انتي احلى
رقله شفتها بحياتي. وقامت ووقفت يم البلكون واهي تقول بكل نعومه ورومانسيه
:: الله يردك بالسلامه يا حمد

بعد خمس دقايق سمت دق قوي على باب غرفتها واهي اخترعت من الزين وسمت
بالرحمن وفتحت الباب وشافت اخوها نصور

سمر: نصور ويعه اشفيك خرعتني يالاهبل

نصور: لا يفوتج بدت اللعبه

بوزت سمور عاد ونست فرحتها من شوي

سمور : واذا انتو ما تبوني العب وياكم ليش تناديني

نصور: يالله عاد سموري حبيبتي نتغشمر وياج كاهو يعقوب اللي قال لي روح ناد
اختك

سمور عاد تشققت من الفرحه : احلف

نصور : يالله عاد ويا ويهج بسرعه تعالي

سمور متشققه من الوناسه : اطلع برع زين عشان ابدل ثيابي

نصور : كويك يا سحليه

سمور: اقلب ويهك زين

بدلت سمور ثيابها عشان تقعد ويا راما مثل ماقالو لها واهم يتطمشون عليها
ويلعبون لكن الله راواهم يوم ما قطع ابوها اللعب وقال لهم الناس مغرب روحو
سبحو وتزهبوا حق الصلاه والكل قام يتأفأف ويقول ان شالله من غير نفس الا
سمور اللي قالت لهم .........زبره بره بره ...... والكل هد اللعب وراحو
يلحقونها عشان يطقونها واهي تشرد عنهم والكل يضحك وفرحان ومتنوس والدنيا مو
سايعته

الجزءالثالث

==========

مرت الشهور الثلاثة الاولى من خبر رده حمد بسرعه ومرت معاها الامتحانات
اللي ابدعت فيها سمور .. سمر على شطانتها الا انها كانت وايد شاطرة بس
ماتحب ترافج احد ولا تحب ولا أبله همها دراستها اللي كانت تشغلها عن كل
هالامور. طبعا كانت تقلد على حمد بالشطارة.

خلصت الامتحانات وانجحت سمر ويابت معدل مرتفع مثل كل مرة ومثل كل مرة سقطت
نصور في المواد اللي دايما يخاف منها وسمر تحب هالفترة لانها تنمدح جدام
العايلة ونصور يلقى له الزف والهواش والعقاب اللي دايما ينحاش منه بعد ما
يتدلع جدام امه ويبدي مسرحيه الملل اللي ملل البيت منها

يوم اليمعه اللي فات الغدى كان في بيت العم بو يعقوب اللي كان يبي يسوي
مفاجئة حق ولده رشود اللي تخرج من الثانويه ويوريه السيارة اللي شراها حقه
..

بيت بو يعقوب اهو مزرعه اكثر من بيت ..لذا سمر تحب تروح هناك وايد بس سارة
وملاحقها لها يخليها ما تروح وايد

كانت سمر يالسه عند البرجه واهي تسمع الاذاعه بالتلفون واغنيه تقطع القلب
تغني ويا المغني :: جالس لحالي ولحالي .. هزني الشوف وذكرتك .. يعني معقوله
يا غالي .. كل هاذا وما وحشتك :: غيبتك طالت ليالي .. يا عسى خير وعذرتك::
سمر ماكانت تدري بالعيون اللي كانت تراقبها واهي رايحه فيها بالاغاني.

ذيج العيون كانت نفس العيون اللي تطالعها من يوم ما كبرت سمر وبدت ملامح
الجمال تظهر عليها بوضوح

محد غيره .. المتوله عليها .. يعقوب

يعقوب اكبر من سمر ب6 سنين وكان لين يفكر فيها يستحي ويقول في خاطره هاذي
بحسبه اختي الصغيرة ويلعن الشيطان ويشغل حاله بشي ثاني لكن هيهات تفارق سمر
باله

سارة تلاحظ اعجاب اخوها المخفي بالطماشه والنقرشه ويا سمور وكانت تضحك عليه
ليش انه يكسر خاطرها ليما تشوف هالحركات منه .. وكله تدعي له لين تشوفه
يطالع سمر بذيج الحنيه والشاعريه " ربي تكون سمر من نصيبك يااخوي"

سارة اليوم كانت وايد عاقدة قرارها انها تكوون صداقة ويا بنت عمها الشيطانة
لو شنو ان شالله.

راحت وقعدت يم سمور اللي كانت رايحة عليها ودموعها متيمعة بعينها .. اول شي
سارة ما كلمتها خلتها على راحتها وانتبهت لها سمور بعدين واضحكت بويها
لاول مرة حتى ان سمر تعجبت من حالها ليش انها ضحكت وياها .. قالت في خاطرها
.. ليش ماارافجها .. احسن منها ماكو .. اول من بدى الكلام اهي سارة لانها
تعرف حق طبيعة سمر اللي الشطانة مغطية على خجلها

سارة: ها شخبار الناجحين ؟؟ عسى مستانسه

سمر: الحمد لله .. عادي ..

سارة بحيرة ما تدري شلون تحاجيها وتذكرت سالفه حمد وقالت في خاطرها ..
هياااا

سارة : هاا؟ شخبار استعدادات ييه حمد ؟؟

انقزت سمر عشان تخبربنت عمها اهي شنو مسوية من استعدادات بس بسرعة فكرت ..
هاذي شدراها عن استعداداتي .. شلي خلاها تسالني عن حمد بالذات ..

سمر تسال سارة والحيا ماخذها: ليش هالسؤال بالذات ؟؟

سارة واهي تبتسم احلى ابتسامه: يعني اذا ماااهتميتي حق موضوع حمد لمنو راح
تهتمي؟

ويوم لاحظت خجل سمر الغريب كملت سارة بشجاعه اكبر

سارة: يا بنت عمي انه ادري انج اكثر وحدة تعزين حمد من بعد خالتي ام حمد
واهو بعد كان واضحة معزته لج.

سمر: صج والله؟ تهقين حمد يعزني مثل ما انه اعزه

سارة : غلطان اللي يقول عكس هالكلام

سمر الدنيا مو سايعتها .. اهي كانت تعرف ان حمد كان يعزها بس كانت خايفه
انه يحسبها مثل اخته اكثر من ما اهي بنت عمه.. بس كلام سارة غير اشياء
وايد.

رد الصمت بيناتهم .. وسارة حست حالها عيزانه ما تدري تفتح أي موضوع ويا سمر
لان سوالفها ما تعجب سمر وسمر وايد صبيانية بتفكيرها ...

قطعت سمر تفكير سارة واهي تناديها: سارة؟

سارة: نعم سمر

سمر مترددة ما تدري شلون تسال سارة عن الموضوع

سمر: سارة انه بغيت اطلب منج طلبة .. بس .. بس كنت خايفة انج ترديني

سارة: افا عليج يا سماري ماعاش اللي يرد لج طلب انتي طلبي وانه انفذ

سمر: وعد ؟؟

سارة: ايوة وعد

سمر: مو تستغلين هالشي عشان تفشليني جدام الشباب

سارة: افا عليج ماتعرفيني اعرق جدام عيال عمي مااعرف شلون اكلمهم
هههههههههههههههههه

سمر: ههههههههههههههههه أي والله نسيت عيل بقول لج

سمر عدلت قعدتها وقابلت بنت عمها بعد ما كانت يالسه حذالها وسارة لا شعوريا
حست ان السالفة جايده ويلست نفس يلسه سمر لها

سمر تكلمها بصوت واطي : ابيج تعلميني حركات بنات

سارة للحين مااستوعبت كلام سمر .. وبعد

سمر : ابيج تاخذيني المجمع اللي دوم تتكلمين عنه عشان اشتري لي منه ثياب
واعدل من شكلي هاذا

واشتريلي شويه اغراض بنات .......... وسكتت سمر لانها ما تصدق اللي اهي
قاعده تقوله حق بنت عمها

سارة كانت شوي وتنقز من الفرحة على هالشي بس يودت حالها عشان بنت عمها تكمل

سارة: اغراض مثل شنو ...؟ سارة كانت تعرف سمر شنو تقصد بس مسويه حالها
ماتدري عن شي

سمر بدت تعصب وتندم على اللي طلبته : خبرج خاتم .. ترجيه .. روج ماادري شنو

سارة تسوي حالها مستوعبه توه للكلام: اهااااااااااا قصدج مكياج واكسسوارارت

سمر بدت تبتسم لانه ارتاحت شوي : أي هاذا اهو .

سارة قعدت تفكر شوي وجاوبتها : ما طلبتي يا بنت عمي

سمر ما صدقت عمرها: صج والله

سارة: أي والله

سمر لا شعوريا حظنت بنت عمها لاول مرة واهي تقول لها: مشكورة سرسر والله
فديتج محد مثلج .. انه طول عمري واقول سارة وبس ... بيية يعقوب حذالهم سمر
غيرت شكلها ونبرت صوتها عشان ترد سمر القبليه واهي تقول : ويعقوبو ياكل خس

يعقوب توه بيقعد استوى مرة ثانيه في وقفتها: انتي ما تقولين لي يالسحليه
انه شنو مسوي فيج عشان اكل خس ويا ويهج

سمور: والله وتسال بعد .. انت اللي يايييب لي المرارة في مصاريني ويا
هالحركات

يعقوب: أي حركات وياحضرتج

سمورر: لا تقعد تستهبل علي انت تعرف عن شنو انه اتكلم

يعقوب زاد من استعباطه عليها : تكفين ويا حلاتج مااعرف علميني.

سمر تقربت من يعقوب اللي طار مخه من كثر ما بنت عمه تخبله

:: لاتنسى هيفاءوو إلى للحين تسالني عن جاسم البغدادي ..

جف حلق يعقوب وبدى يطالع سمور بحقد .. هاذي من وين تعرف هالسوالف منو يقول
لها عن سوالفه ويا ربعها البنات

قام يعقوب واهني بين سمر قزمه بطوله واهي يطالعها من فوق خشمه .. انتي
ماتيوزين يالسحليه انه شنو المفروض اسوي فيج اللحين

سمور عقدت ايديها على صدرها ونفخت روحها عليه وتطالعه من صوب عينها: ولا شي
سوى انك تاخذ بعمرك وتقلب ويهج عشان اكمل سوالف ويا بنت عمي وصديقتي

قلدها يعقوب : اوه اوه اوه من متى وانتو ربع

سارة بغت تتكلم بس سمر قاطعتها: مو شغلك .. وقامت تطالع سارة وتقول : اصلا
احنه ربع من زمااااااان بس محد كان ملاحظ هالشي

يعقوب: اهااا بالمبارك عيل عليج اختي سارة والله يعينج يا سويرة على اللي
بتلاقينه ويا هالنسرة

سمر: هااا؟؟ بديت تدز حظك وياي

يعقوب : ياللله ياللله قلبي ويهج اخر زمن لاتخليني الحين اشلج واقطج
بالبرجه

سمر: فيك خير سوها

يعقوب: ها سارو.. اعقها

سارة واهي تضحك: لا صل على النبي شنو تقطها خلني انه وياها صج انك رزة ما
تنعطى ويه يالله الب ويهك

يعقوب : شفتي خربتج هالنسرة

سمر: نسرة انت

يعقوب واهو يمشي عنهم: سحليه

سمر: سحليه انت

يعقوب: ذكيه

سمر: الذكي انت

وفجت عينها سمر على اخرهم عشان المغلب اللي قطها ولد عمها فيه وخلاها وراح
واهو يضحك عليها واهو يقول لها: ما يحتاي انه من زمان ذكي

سموور كانت معصبة ولو على بدها تذبح يعقوب بس مسرع ما نسته وردت حق بنت
عمها عشان يخططون عشان التشري.

الجزءالرابع والاخير

====================

في ميلس البيت بو حمدان كان يالس وحذاله ولده حمدان اللي صار له شهر واهو
يبي يفاتح ابوه عن موصوع سارة بنت عمه بس الحيا ماخذه ونصور الللي كان مطرب
الناس بغناويه يطالع اخوه ويشجعه عشان يفتح الموضوع بس حمدان مو ماعطه ويه
.. ونصور ايغني ويعزف على العود ويقول .. خليتني ما بين شكي وخوفي .. ارجع
يا روح الروح الهجر ما يسوى ,, خليتني ما بين شكي وخوفي .."" مشعل رايحه
عليه بالاغنيه واهو يغني ويا اخوه وعمايمه معظم صاخين من بعد الغدى الا
حمدان اللي كان يحترق ويقول لابوه عن سارة

بعد ما سكت نصور راح يلس حذال اخوه

نصور: اشفيك انت صاير لي خواف.

حمدان جف ريجه من التوتر: اسكت واللي يرحم والديك انه حدي موصل

نصور واهو ماسك بطنه عن لا يضحك على اخوه: ياخوي والله ماهقيتك تطلع لي
خواف يالله قول اللي في بالك وفكنا.

حمدان قلب لونه اصفر واهو يطالع اخوه عشان يتنعز : ما بتقوم ولا اشق حلجك

نصور وحمدان ظلوا يتهاوشون على خفيف ليما وعى ابوهم

الاب: اعنبو داركم اشفيكم انتو الاثنين يالسين تتبسبسون مثل القطاوة
والحريم ما تقولون لي ليش ما تفارجون

نصور الملقوف اول من بدى الكلام: يوبا اصلا اخوي حمدان يبي يتكلم وياك
بكلمه راس بس مستحي

حمدان قلب ويهه ابيض اللي يقولون صابين عليه ماي بارد: هااااا؟؟ انا؟؟؟

الاب : اشفيك صفا ويهك

حمدان : ها ها يبا

الاب: ياه ما تقول

نصور الملقوف: يوبا السالفه وما فيها .... يطالع يمين ويسار يدور على عمه
بو حمد عشان يوطي صوته .... اخوي حمدان يبيك تخطب سارة حقه

الابو ابتسم بوسع حلجه وطالع حمدان: ايا يالخق صار لك شهر تتلصق فيني مو
على شي اثاريك تبي بنت عمك سارة

حمدان بغى يغمى عليه من التوتر: أي يوبا تكفى طلبتك ماابي البنت تروح من
يدي

الابو ضحك على ولده واهو يعدل من قعدته : تم وانه ابوك باجر اكلم عمك
بديوانيه مبارك ولا يهمك ولا تشغل بالك.

حمدان ما سعته الدنيا بس نصور اللي قام على طوله يبوس راس ابوه : مشكور
يوبا ما تقصر يعل عيني ما تبجيك يا يوبا.

الابو دز نصور عنه : اللحين انه ابي اعرف انت اللي تبي سارة ولا حمدان ..
انت شكو .. طالع ملقوف على منو انت.

حمدان وقف ويود اخوه من ذراعه عشان يطلعه من الميلس: والله ماادري يا يوبا
هاذا الملقوف طالع على منو

نصور يطالع حمدان بنظرة مسرحيه : افااااااااا اللحين طلعت جذي .. صج انك ما
تستحي

حمدان ضحك عليه وطلعه وياه بس ناصر رد الميلس ينادي على مشعل وراشد عشان
يطلعون ويا بعض والكل مستغرب من حمدان اللي كان فرحان حيل من رد ابوه عليه.

اتـــــ،،ـــــمنى تكون الرواية عجبتــــ،،ـــــكم واوعدكــــ،،ــــم بالجديد

طبعا اذا كانت عاجبتكم هالرواية ...

تقديري واحترامي للجميع

اخوكم .. ويـــــــلآهـ

اخي ويلاه العسيري اعلم انك من انشط الاعضاء في
منتدى همس الخفوق واني لاشد المعجبين بقلمك
انتضر جديدك ... تقبل مروري
اخوك أميــــــــــــــــــــــــر

لك مني كل الشكر على مرورك بصفحتي

واعجابك شرف كبير لي يالغالي

نحن جميعا هدفنا واحد وهو رقي المنتدى

اسعدني مرورك ,,,

سراحه روايه جميله منك ياعسرى ولاهومستقر ب منك الروايه الجميله وانا من عشاق الروايات
واتمنى الجديد منك وأفضل مالديك اتمنالك حياه سعيده وممتعه

الشكر لك اخي على مرورك

وشرف عظيم لي ان الرواية حازت على استحسانك

اعدك بتقديم ما يسرك ولا تحرمنا طلتك

لك كل الود رواية ولد العم 823960

» رواية الحب مايرحم سلاطين وملوك